السبت، 20 يوليو، 2013

انا و الجاتوه و الكريم كراميل (نوستالجيا)



ومن الجدير بالذكر ان كل الولاد اللي كانوا معايا في ابتدائي محدش فيهم وصل للثانوي يعني  اللي بقى معاه دبلوم صناعي او زراعي بس محدش دخل ثانوي

بسم الله ماشاء الله  كنا فصل متفوقين
و الجدير بالذكر اننا لما كنا في ساتة ابتدائي ماحنا اصلا الدفعة المزدوجة و كدة ، كان معانا ماتش اوائل طلبة و قالك ان في فقرات ترفيهية اخدوا من فصلنا بقى للفقرات الترفيهية ماعدا انا دخلوني في فريق المسابقة التعليمية 
و في صباحية زي الفل  قالك يلا يا ولاد معانا مشوار لحد مدرسة النصر ، على فكرة اسم مدرستنا النهضة بس متقولوش لحد :) 

طيب يا باشا ناخد حنتور  ( لم يكن التوكتوك قد اخترع بعد )
حنتور ايه الليهيكفي الجرمق ده يلا اتمشوا 

و عليها بقى اخدنا المشوار مشي و وصلنا بحمد الله 
لقينا الفريق التاني مستنينا دخلونا فصل بقى و قالك الأول هيرحبوا بينا بفقرة غنائية 
(دول بتوع النصر عالم رايقة ) قال فنية قال 
المهم تلات بنات و ماسكين قال ايشاربات و بيلفوها في الهوا و بيغنوا 
المهم كانت اغنية مملة احلى حاجة فيها لما قالوا 
( علم مصر تلات ألوان 
احمر و ابيض و اسود كمان )
ففي مدرس منهم كان جنبنا كملها 
( و في النص فروجة بسنان )  اي بلغتكم الدارجة دجاجة  لها أسنان
و ابتسم بعد جملته  ابتسامة واسعة مخيفة الصراحة اظهرت  سنانه كلها الواقعة و مش فاضل فيها غير ضرسين بصراحة لم نتمالك انفسنا و ضحكنا 
و بعدين جه اهم حاجة في الحفلة (الجاتووووووووه )
أه الجاتوه اهم حاجة كفاية اقولك ان بلدنا  مكنش فيها ولا محل جاتوه لحد سنتين فاتوا 
يعني الجاتوه بالنسبالنا كان خيال علمي 
و تخيل بقى  اغلب فريقنا الثقافي بنات ، و عاملين يعني انهم محترمات و بتوع اتيكيت و مينفعش ياكلوا جاتوه فاستطعت انا و اصدقائي الفشلة نلم  كل جاتوه البنات و نبدأ مذبحة في آخر تختة ورا لولا بقى الله يسامحهم نادوني قالولي المسابقة الثقافية هتبدأ 
قلتلهم مع نفسكم و طبعا المدرس زعقلي يلا يا واد و مش عارف ايه 
اضطريت آسفا اسيب الجاتوه بس توعدت العيال لو فتفوتة نقصت هاولع فيكم 
و طبعا مش فاكر مين كسب و لا خسر اللي فاكره اني ملقيتش الجاتوه 
و استمرت بقى عقدة الجاتوه معايا لحد الكلية
و في الكلية في اسيوط كنت باخد المشوار من المدينة الجامعية لآخر ساعة اللي جنب المحطة مشي( اللي من اسيوط هيعرف المشوار ده ) علشان بس آكل جاتوه 
أختي كانت في كلية هندسة و ساكنة في المدينة الجامعية بتاعت البنات ، المهم ان الزيارة مسموحالها بس  خميس و جمعة 
يعني فهي يا عيني كانت بتستنى الخميس علشان ازورها وكده و اخرجها يعني و نلف في البلد 
وطبعا  محسوبكم ندل يعني ممكن افوت اسبوع او اتنين ماسألش فيها بس لما الفلوس تقصر معايا اروحلها قال يعني علشان نخرج و كده في حي الهدف بتاعي كان الندالة 
و كان برضه نفس المشوار لحد آخر ساعة  وناكل جاتوه و بعدين نرجع
و في مرة شاورتلها على مطعم قلتلها المطعم ده  أكلت فيه كريم كراميل تحفة 
هي بقى قالتلي ما تعزمني فيه قلتلها لا ممكن ابدا 
و بما اني ندل فضلت برضه بصفة منتظمة آكل كريم كراميل 
بعد ما خلصنا كلية و اختي اتجوزت و خلفت 
بقت كل ما تزورنا لازم تعمللي كريم كراميل 
أختي غلبانة اوي بصراحة 
مش عارف هي لو شافت البوست ده هتعمل فيا ايه 
خلي البوست في سركم وهاحاول اعملها حظر :)


هناك 3 تعليقات: